"زياد شعبو": مرقولنا هالبطولة

علق لاعب منتخب سوريا السابق "زياد شعبو" على المشاحنات الرياضية الحاصلة مؤخراً نتيجة خروج "نسور قاسيون" من الدور الأول لبطولة "آسيا".

"شعبو" وعبر حسابه الخاص على "فيسبوك" كتب: «مرقولنا ياها: هالكلمتين اكتر كلمتين سمعتن خلال مسيرتي الطويلة مع المنتخب، ويمكن أغلب اللاعبين الدوليين بيعرفوا ايمتى بينقالوا هالكلمتين.

مثلا: كنا نجي عالمعسكر ما في تياب تمرين، نسأل الاداري عن التياب يقلنا: أي مرقولنا هالمعسكر على خير، نكون مسافرين على شي دولة بشرق آسيا والسفرة تكون على دفعتين، يعني نص الفريق بيسافر اليوم والنص التاني بكرا، نسأل الاداري يقلنا: لك شبكون هيي سفرة مرقولنا ياها، ندخل على مباراة فاصلة ما نعرف قوانين التأهل، يكون ببالنا فرق مواجهات تطلع فرق أهداف، نلعب على أساس فرق أهداف تطلع فرق مواجهات، وهيك بس نطلع برا يقولولنا يلا بسيطة مرقولنا هالبطولة، وهيك إلنا سنين منمرق مباريات وبطولات ومنحصد خيبات، مشكلة كرة القدم السورية هيي مشكلة إدارية بحتة، وقت يتقاتلوا ولادك قدام العالم على قنية عصير، الناس مارح تلوم الولاد كتير، ببساطة الناس رح تسب عليك، و تقول: الله يلعن أبو عالترباية، لذلك مرقولنا هالبطولة».

يذكر أن العديد من النشطاء يطالبون بإقالة رئيس اتحاد كرة القدم "فادي دباس" نتيحة الخروج من البطولة الآسيوية، الأمر الذي استبعده الأخير في تصريح لجريدتنا لحظة وصوله إلى مطار "دمشق" الدولي.

المصدر: رصد