ممثل سوري عن «تكامل»: «عَ أي قانون عم تشتغل»

 

نشر الممثل والمخرج السوري "ممدوح الأطرش" عبر صفحته الشخصية على فيسبوك تعليقاً على حادثة جرت معه أثناء الذهاب إلى "شركة تكامل".

وكتب "الأطراش": «البيروقراطيه المقيته، الله غضب عليي ورحت على مؤسسة تكامل لطلع بطاقة بنزين لسيارة اشتريتها لبنتي بموجب وكالة عامة مصدقة أصولاً من "كاتب العدل" حديثاً وممهوره بختم وزارة العدل وبلشت رحلة الألف ميل، وعلى مدار يومين استخدمت كل طاقاتي الفنية والإبداعية لاقدر أحصل على بطاقة البنزين الذكية ولكن عبث، والجواب كان واحد لازم صاحبة السيارة تكون موجودة.. طيب يا عمي أنا معي وكالة عامة مخولتني بيع واشتري وإفرغ واقبض وادفع، كمان عبث قانون الشركة بدو يكون صاحب العلاقة، طيب فرضاً صاحب العلاقة مريض مشلول مكورن عندو سبب قاهر وعامل وكالة قانونية وعامة ليش بدكن تعركسوها بوجه هالمواطن المشحر، ليش لتذلوه وتخالفو القانون بدولة القانون بين قوسين طبعاً، المهم عدنا بخفي حنين، وعم نعبي بنزين بسعر الحر حدا بيعرفلي هاي الشركة "تكامل" عَ أي قانون عم تشتغل».

وختم منشوره قائلاً: «السؤال الأهم كيف بدي عيش بلا بطاقه ذكية أنا؟.. أحياناً موضوع بسيط وزغير بيخليك تقطع جذورك اللي زرعتها بهالأرض بايديك.. قانون جلف وبيروقراطيه مقيتة ووقاحة باستخدام كل الطرق لإذلال المواطن.. فعلاً إن لم تستحي فافعل ما شئت».

المصدر: رصد