لطشة.. التقليد الأعمي

هاد يا سيدي وبدون طول سيرة، كان في مقدم برامج أمريكي اسمو جون ستيوارت عمل برنامج اسمو ذي ديلي شو.

البرنامج بلش من 1999 وحقق نجاح كبير بالولايات المتحدة وعمل ثروة بشي اسمو برامج التوك شو.

النجاح يلي عملو ستيوارت كان حلم كتيرين حول العالم، وحاول كتار يقلدوه وما قدروا، لكتير أسباب منها أنو ما عندو الكاريزما وما عندون الأفكار وما عندون وما عندون، بس السبب الأهم أنو كل يلي حاولو يقلدوه كان عم يستنسخو جون ستيوارت متل ما هو، وهاد الشي سببلون الفشل الكامل.

لحد ما طلع عام 2011 دكتور مصري اسمو باسم يوسف وقرر يعمل برنامج توك شو مصري، باسم أخد الفكرة من ستيورات بس قولبها عالواقع المصري وجاب أفكار بتهم الشعب المصري.

وكان جريء بطرح الأفكار وبعيد عن الابتذال.

باسم وخلال 3 مواسم بس صار الإعلامي الأشهر بالوطن العربي، حتى أنو بإحدى حلقات برنامجو استضاف جون ستيوارت بذاتو، وجون ستيوارت كمان استضاف باسم ببرنامجو بأمريكا.

وبعد باسم يوسف حاول كتير تقليد باسم يوسف وجون ستيوارت وكمان فشلو، باستثناء حالات قليلة ضلت مستمرة رغم أنها ما حققت الشهرة يلي وصلها باسم يوسف، متل عادل كرم وهشام حداد بلبنان والبشير شو بالعراق.

هالتجربة جرب البعض يستنسخها بسورية إلا أنها فشلت فشل ذريع، مول أنو سقف الحرية عنا مالو حدود لا سمح الله، بس لأن يلي حاولوا يعملوا هالشي أخدوه كوبي بيست يعني تقليد أعمى، والتجارب القليلة ماتت بأرضها.

كل شي حكينا بينطبق على يلي عم يصير اليوم عالسوشال ميديا، في عالم بتبدع فكرة وبتنجح فيها وفي عالم بتسنسخها متل ما هي وبتفشل تماماً، ليش. 

بكل بساطة لأنو ما قكرت بشي مختلف فيك تقلد العالم وهاد شي طبيعي بكل العالم بس الغلط أن تكون أعمى تقلد بدون ما تضيف أسلوبك وأفكارك والبادي لانغوج الخاصة فيك بلا معنى.

ودمتم.

المصدر: خاص

بواسطة :